Ніводная зь беларускіх ВНУ ня трапіла ў Tоп-200 найлепшых унівэрсытэтаў сьвету

У новым выпуску адмысловага дадатку Times Higher Education да газэты Times апублікаваны сьпіс найлепшых унівэрсытэтаў сьвету за 2008 год. Ня толькі беларускія ўнівэрсытэты ня трапілі ў прэстыжны рэйтынг. Сярод усіх ВНУ нашых суседзяў адно МДУ імя Ламаносава займае 183 месца. Пераважную большасьць ў рэйтынгу складаюць унівэрсытэты ЗША і Вялікабрытаніі.

Пры складаньні The TOP 200 WORLD UNIVERSITIES выкарыстоўваецца набор паказчыкаў, сярод якіх колькасьць згадваньня ВНУ акадэмічнай супольнасьцю, колькасьць замежных студэнтаў, суадносіны ліку супрацоўнікаў і студэнтаў ВНУ. У дасьледаваньні, праведзеным сёлета, прымалі ўдзел 8 600 навуковых супрацоўнікаў, прычым выкладчыкам забаранялася даваць адзнаку той ўстанове, дзе яны працуюць.

Два першых месца ў рэйтынгу займаюць Гарвардскі (Harvard) і Ельскі (Yale) унівэрсітэты, трэцяе і чацьвёртае месца атрымалі Кембрыджскі (Cambridge) і Оксфардскі (Oxford) унівэрсытэты.

Складальнікі рэйтынгу адзначаюць рост колькасьці тэхнічных ВНУ ў параўнаньні зь мінулымі гадамі.