У Салігорску ля суду затрыманыя 15 чалавек. Людзей збівалі

Ля Салігорскага раённага суду, дзе пачаўся суд над актывістам «Маладога Фронту» Іванам Шылам, былі сёння затрыманыя 15 актывістаў апазіцыі. Пра гэта прэс-цэнтру Хартыі’97 паведаміў моладзевы лідэр Павал Севярынец.

Па яго словах, да суду, каб падтрымаць Івана Шылу, прыйшлі больш як 50 чалавек. Людзі трымалі ў руках расцяжку «Малады Фронт не спыніць» і скандавалі «Свабоду Івану Шыле!» і «Жыве Беларусь!».

Затрыманне рабілі супрацоўнікі палка міліцыі спецыяльнага прызначэння (былы АМАП). Затрыманыя Франак Вячорка, Зміцер Хфедарук, Кацярына Галіцкая, Людміла Атакулава і іншыя. Шматлікія людзі жорстка збітыя, паведаміў Павал Севярынец.

Цяпер усе затрыманыя знаходзяцца ў амапаўскім аўтобусе ля будынка суду.

Жывы рэпартаж з судоў над Настай Азаркай ды Іванам Шылам

гэты артыкул пастаянна абнаўляецца

Наста Азарка

Іван Шыла

Нясьвіж, 9.45: Каля суду зьбіраюцца людзі, якія прыехалі падтрымаць Насту Азарку. Сярод іх — Сяргей Панамароў з Клецку, Павал Красоўскі з Жодзіна, Алесь Міхалевіч зь Менску. Усяго каля 15 чалавек.

Дзяжурыць каля суду й група БТ з журналістам Дзянісам Бальшаковым, які стаў вядомы сваімі рэпартажамі з Плошчы.

Вельмі шмат міліцыі й супрацоўнікаў у цывільным. Яны ці не на кожным рагу вуліцы. Прыежджых, што кіруюцца да суду, не хаваючыся "вядуць" ад патруля да патруля.

Нясьвіж, 10.01: Пачаўся суд. Падрымаць Насту прыйшлі каля 20 чалавек. Прозьвішча судзьдзі — Дунаева.

Салігорск, 10.01: Для суду над салігорскім актывістам Іванам Шылам у мясцовым раённым судзе вылучылі самую вялікую залю, на 60 чалавек. Але яна ці не на палову запоўненая людзьмі, у якіх мясцовыя жыхары пазнаюць сацыяльных пэдагогаў мясцовых школ.

Падрымаць Івана прыехалі вядомыя палітыкі й праваабаронцы, сярод іх — Алесь Бяляцкі, Валер Ухналёў, Анатоль Лябедзька, Валянцін Стэфановіч. Сабраліся моладзевыя актывісты з Салігорску й іншых гарадоў. Яны абяцаюць праводзіць акцыю падтрымкі пад вокнамі суду.

Салігорск, 10.14: Іван Шыла хадайнічаў, каб з залі быў выдалены невядомы чалавек, які здымаў паседжаньне на камэру. Судзьдзя хадайніцтва задаволіла й чалавек з камэрай пакінуў залю.

Ільля заявіў, што не разумее расейскай мовы. Таму ў працэсе ўдзельнічае перакладчыца беларускай мовы.

Салігорск, 10.26: Пад будынкам Салігорскага суду сабралося каля 60‑70 чалавек. Іх шчыльна абступіў АМАП, у моладзі сілай адабралі расьцяжку. Да суду пад’ехалі тры міліцэйскія аўтобусы.

Моладзь скандуе «Свабоду!», «Жыве Беларусь!»

Салігорск, 10.31: Жорсткі разгон моладзі ў Салігорску.

Акцыя падтрымкі моладзі каля раённага суду ў Салігорску жорстка разагнаная. Тых, хто меў хоць якую сымболіку, значкі, пахапалі й кінулі ў аўтазакі. Астатняя моладзь паспрабавала заступіць дарогу аўтобусу, тады пачалося зьбіцьцё й новыя затрыманьні.

Нясьвіж, 10.37: Каля будынку суду знаходзяцца каля 25 чалавек, якім не хапіла месца ў залі.

Салігорск, 10.39: Іван Шыла прапанаваў судзьдзі адразу абвесьціць прысуд, бязь лішніх фармальнасьцяў. У справе фігуруюць матэрыялы праслухоўваньня тэлефонных размоў Івана.

Салігорск, 10.46: Іван Шыла адмовіўся даваць паказаньні. Суд заслухае паказаньні, якія Іван даваў у часе сьледзтва.